ائولی‌لیک ایله اخلاق – بئرتراند راسئل

چئویرن: آراز گوندوز

گونئی نیوز:هاچاغاجان ناموس‌لو اولماق قادین اوچون ان اؤنملی بیر ده‌یر ساییلاجاق‌سا، اوچاغاجان دا، توپلومون بیر باشیندا یئرینی برکیتمیش ائولی‌لیییه قارشی، توپلومون او بیری باشیندا ائله بو ائولی‌لیین ائکیز تایی ساییلاجاق بیر عادت ده اؤزونه یئر ائله‌‌یه‌جکدیر، اونون آدی فاحیشه‌لیک‌دیر. ائله بیلیرم، لئکی‌نین(1) بللی کیتابینداکی بو سؤزلری چوخ‌لاری اوخوموش‌دور: «فاحیشه‌لیک اولماسایدی، نه بیزیم عائله‌لریمیز مقدس ساییلاردی، نه ده خانیم‌لاریمیزلا قیزلاریمیز معصوم اولاردیلار». بئله سؤزلری آنجاق ویکتوریان‌چی(2) اولان بیر آدام یازا بیلردی، آنجاق بوراسی دا وار، اونون بو دئدیک‌لرینی دانماق چوخ چتین‌دیر. لئککی‌نین بو سؤزلرینی اوخویان اخلاق‌چی‌لار(مورالیست‌لر) قودوزلاشیب اؤزلریندن چیخدیلار، اونو اوتانمازلیق‌لا سوچلادیلار، آنجاق اونون بو سؤزلرینی یالانا چیخارا دا بیلمه‌دیلر. مورالیست‌لرین دئمه‌سینه گؤره–منه ائله گلیر، اونلارین بونو دوز دئییرلر،–اینسان‌لار هامی‌لیق‌لا اخلاق نورمالارینا بویون ایمه‌یه باشلایان کیمی، فاحیشه‌لیک بوسبوتون یوخا چیخاجاق‌دیر؛ آنجاق اونلار اینسان‌لارین هامی‌لیق‌لا اخلاق نورمالارینا بویون ایمه‌یه‌جه‌یینی ده چوخ یاخشی بیلیرلر، اونا گؤره ده، اینسان‌لارین هاچاغ‌سا گؤرمه‌یه‌جک‌لری بیر ایشین، بیردن اونلار بونو ائلیرلرسه هانسی سونوج‌لار وئره بیله‌جه‌یینی دوشونمه‌یین ده هئچ بیر آنلامی یوخ‌دور.

فاحیشه‌لییین اورتایا چیخماسینا گلینجه، بللی اولدوغو کیمی، بونون یارانما سببی ان چوخ، سوبای، یاخود ائولی کیشی‌لرین ائودن اوزاق دوشوب، اؤزلری‌نین باش قالدیران جینسی ایستک‌لرینی ناموس‌لو ساییلا بیله‌جک هانسی‌سا قادین‌لا اووودا بیلمه‌مه‌سی ایله باغلی‌دیر. بو سایاغی جینسی ایستک‌لرین اووودولماسی اوچون، توپلوم‌دا بللی کاتئگورییادان ساییلان قادین‌لار اورتایا چیخمیش‌دیر، دوزدور، توپلوم اونلارین وارلیغینا گؤره اوتانیر، آنجاق اونلارسیز کئچینه ده بیلمیر. فاحیشه‌نین ایسته‌نیلن واخت ال‌چاتان اولماسی دا، اونون آنجاق کیم‌لرین‌سه جینسی ایستک‌لری‌نین سویودولماسینا قوللوق ائلیه‌رک، گؤزدن-کؤنول‌دن اوزاق‌دا قالماسی دا، توپلوم اوچون چوخ الوئریش‌لی‌دیر؛ ائله بونا گؤره ده، کیشی‌لر اونونلا ایش‌لرینی گؤروب قورتاران‌دان سونرا، اؤز عائله‌لرینه، خانیم‌لاری‌نین یانینا قاییدیرلار، هله دئسه‌ن اؤزلرینی سیندیرمادان، هئچ نه اولمامیش کیمی، آلنی‌آچیق- اوزو‌آغ کیلسه‌یه ده گئدیرلر. آنجاق بو فاحیشه آدلانان یازیق قادین‌لار ایسه، توپلومون ایش‌لرینه بونجا یارادیق‌لارینا، عائله‌لرده‌کی قیز-گلین‌لرین، توپلومداکی کیلسه باشچی‌لاری‌نین یاخشی آدلارینی قورویوب ساخلاماغا قوللوق ائلدیک‌لرینه باخمایاراق، هامی‌نین قارشی‌سیندا باشی‌آشاغی گزمه‌لی اولور، گؤزه گؤرونمه‌مه‌یه چالیشیرلار، اونلارین، توپلوم ایچینه چیخیب اینسان‌لارلا قایناییب قاریشماق اوچون بوتون یول‌لاری باغلانمیش اولور. بو آجیناجاقلی عدالت‌سیزلیک، خریستیان‌لیغین یارانماسی ایله باشلامیش، بوگونه‌جن ده گلیب چیخمیش‌دیر. توپلوم‌دا فاحیشه‌لیین اولماسی اونون اوچون اسکیک‌لیک‌دیر، بونا سؤز اولا بیلمز، آنجاق بونون بئله اولماسی هم ده، اخلاق‌چی‌لارین گؤردوک‌لری ایش‌لرین ده هئچ بیر ده‌یری‌نین، کسه‌ری‌نین اولماماسیندان سوراق وئرمکده‌دیر. فروید-ون دئمه‌سینه گؤره، بیزیم آنلاغیمیز بیر سیرا دوشونجه‌لریمیزی سیخیشدیریر، بونا گؤره ده اونلار بیزیم آلت بیلینجیمیزده اؤزلرینه یئر ائله‌ییب قورونوب ساخلانیرلار؛ عینی ایله بونون کیمی، فاحیشه‌لیک ده توپلومون آلت بیلینجینده قورونوب ساخلانماق‌دادیر. آنجاق بئله بیر سورگون عؤمرو یاشایان فاحیشه‌لیک، اؤزو ده بونو ایسته‌مه‌دن، اونون وارلیغینی بوراجان آلچالدان توپلوم‌دان اؤز قیصاصینی آلماغا باشلاییر.

فاحیشه‌لیک هئچ ده همیشه آلچاق ایش ساییلمامیش، ایندی اولدوغو کیمی گؤز قاباغیندان قووولمامیش‌دیر. باشلانغیجدا بیزیم ایندی فاحیشه آدلاندیردیغیمیز قادین‌لار، چوخ‌تانری‌چی‌لیق معبدلری‌نین کاهین‌لری اولموش، او چاغ‌لارداکی توپلوم‌دا اونلارا بؤیوک سایغی‌لار گؤستریلمیش‌دیر، بو قادین‌لار تانیمادیق‌لاری کیشی‌لرین جینسی ایستک‌لرینی اؤده‌مه‌یین، تانری‌لارا قول‌لوق ائله‌‌مک اولدوغونو سانمیشلار. معبدلرده یاشایان بئله کاهین قادین‌لار، توپلوم‌دا ساییلیب سئچیلن قادین‌لار اولاراق تانینمیش، کیشی‌لر اونلارلا جینسی یاخین‌لیق ائله‌مه‌یی اؤزلری اوچون باشی‌اوجالیق سانمیشلار. کیلسه روحانی‌لری‌نین معبد فاحیشه‌لییی ایله باغلی چوخلو یازی‌لاری ایسه، باش‌دان-آیاغا یالان‌لارلا دولودور، اونلار بو یازی‌لارین‌دا چوخ‌تانریچی‌لیغا تاپینان بوت‌سئورلرین ایبلیس‌له ایلیشکی‌لر قورماق اوچون بو قادین‌لاردان یارارلاندیق‌لارینی اؤزلریندن اویدورموشلار. بوت‌سئورلرین معبدلری باغلاندیقدان سونرا، فاحیشه‌لیک اورادان چیخیب توپلوما آیاق آچدی، اونو باش‌دان-باشا بورومه‌یه باشلادی، ایندی ایسه اونون مقصدی آنجاق پول قازانماق‌دیر. دوزدور، چوخ پیس آد چیخارمیش فاحیشه‌خانالارین، حامام‌لارین، هابئله بونون کیمی، فاحیشه‌لییین یووا سالدیغی یئرلرین یییه‌لری بو ایشدن یاخشی قازانج گؤتورمه‌یه باشلادیلار، آنجاق فاحیشه‌لره گؤردوک‌لری بو ایشه گؤره قپیک-قوروش چاتیردی، اونلار دئمک اولار، بو ایشه یییه‌لیک ائله‌‌ین‌لرین کؤله‌سینه چئوریلیردیلر؛ آنجاق سون ایل‌لرده، یالنیز اؤزو اوچون ایشله‌ین تک‌باشینا فاحیشه‌لر ده اورتایا چیخا بیلمیشلر. بیلدیییمه گؤره، بوگونکو هیندیستان‌دا معبد فاحیشه‌لیییندن فاحیشه‌لیک بیزنئسینه کئچید هله بوتونلوک‌له باشا چاتمامیش‌دیر. «آنا هیندیستان» کیتابی‌نین مؤلفی کئترین مئیو، بئله بیر گئریچی‌لیین ایندییه‌جن قالماسی‌نین، بو اؤلکه‌نی بوتون سوچ‌لاردا یامانلاماق اوچون اساس وئردیینی دئییر.

بوگون، دئیه‌سن گونئی آمئریکا‌دان باشقا، دونیانین هر یئرینده فاحیشه‌لیک آزالماغا دوغرو گئدیر. بو بیر یاندان، ایندی قادین‌لارین فاحیشه‌لیک‌دن باشقا یوللارلا دا اؤزلرینه ایش تاپیب دولانیشیق قورا بیلمه‌لری ایله باغلی‌دیر؛ باشقا یاندان دا، ایندی توپلوم‌لارین چوخوندا ائولی‌لیکدن قیراق‌دا دا، قادین-کیشی ایلیشکی‌لرینه یول وئریلمه‌سینه گؤره‌دیر. بونا باخمایاراق، فاحیشه‌لییین بوتونلوک‌له یوخ اولوب گئده‌جه‌یینه من اینانمیرام. اؤرنک اوچون، اوزون سور‌ن گمی یولچولوغوندان سونرا ساحیله چیخان دنیزچی‌لری گؤتورک. اونلارین جینسی ایستک‌لری ائله بیر چیلغینلیغا چاتیر، بو ایستک‌لرینی سؤندورمک اوچون گؤزله‌مه‌یه دؤزوم‌لری قالمیر، هانسی‌سا قادینین قوللوغونو گتیرمک، هانسی‌سا سئوگی ایلیشکی‌لری آختارماق حاقیندا دوشونمور، بیرباشا فاحیشه‌لرین اولدوغو یئرلره اوز توتورلار. باشقا کاتئقورییادان اولان، اوغورسوز ائولنمیش، یاخود دا اؤز خانیم‌لاریندان قورخان کیشی‌لری گؤتورک. اونلار جینسی ایستک‌لرینی، اؤز ائولریندن قیراق‌دا، هئچ بیر پسیکولوژی گرگین‌لیک کئچیرمه‌دن یئرینه یئتیره‌نده اؤزلرینی چوخ آزاد ساییر، یالنیز بئله ایلیشکی‌لردن اورک‌لری ایسته‌ین کیمی دویغولانا بیلیرلر. بوتون بونلارا باخمایاراق، فاحیشه‌لرین سایینی باجاردیقجا آزالتماق چوخ اؤنملی بیر ایش ساییلمالی‌دیر. بونون اوچ باشلی‌جا سببی واردیر: بیرینجی‌سی، فاحیشه‌لییین توپلومون عمومی ساغلام‌لیغینا قورخو یاراتماسی‌دیر؛ ایکینجی‌سی، فاحیشه‌لییین قادین پسیکولوژیسینی چوخ کورلاماسی‌دیر؛ اوچونجوسو، فاحیشه‌لییین ائله کیشی‌لرین ده پسیکولوژیسینی کورلاماسی‌دیر.

بو سبب‌لردن ان باشلیجاسی، سؤزسوز، ساغلام‌لیق اوچون یارانان قورخو ایله باغلی‌دیر، بللی اولدوغو کیمی، فاحیشه‌لردن هانسی‌سا زؤهره‌وی خسته‌لیییه یولوخماق قورخوسو همیشه واردیر. بونو آرادان قالدیرماق اوچون، فاحیشه‌لری دؤولت قئیدیاتینا آلماق، اونلاری تئز-تئز طیببی یوخلامالاردان کئچیرمک ده اؤزونو سوناجان دوغرولتمور؛ بوندان باشقا دا، بو سایاغی پولیس نظارتی‌نین قویولماسی، چوخ واخت فاحیشه‌لیک‌له باغلی اولمایان، اوره‌یی ایسته‌ین کیمی جینسی ایلیشکی‌لر قوروب یاشایان قادین‌لارین دا گؤز آلتینا آلینماسینا گتیریب چیخاراراق، اونلاری آلچالدیر. زؤهره‌وی خسته‌لیک‌لره گلینجه، اونلارین ایشله‌دیلن گوناه‌لارا گؤره وئریلن جزا کیمی آنلاشیلماسی دوشونجه‌سی اورتادان گئتمه‌یینجه، بو خسته‌لیک‌لرین ساغالدیلماسی ایشینده‌کی گئری‌لیک‌لرله، چاتیشمازلیق‌لار دا قالاجاق‌دیر. بو خسته‌لیک‌لرین قارشی‌سی‌نین آلینماسی اوچون گره‌کن بیلیک‌لرین یاییلماسی دا چوخ اؤنملی‌دیر، آنجاق بیر چوخلاری بونا قارشی چیخیر، بوتون بونلارین باش وئرن سئکسوال گوناه‌لارین آرتماسینا گتیریب چیخاراجاغینی دئییرلر. چوخ واخت زؤهره‌وی خسته‌لیک‌لره توتولموش آدام‌لار حکیم یانینا گئتمه‌یه اوتاندیق‌لاریندان، اؤز ساغلام‌لیق‌لارینی برک کورلاییرلار. دوزدور، ایندی بو خسته‌لیک‌لرله باغلی دوروم یاخشی‌لیغا دوغرو ده‌ییشمکده‌دیر، اینسان‌لارین بو یولوخمایا قارشی موناسیبت‌لری‌نین ده‌ییشمه‌سی، اونون گئت-گئده آزالماسیما گتیریب چیخارا بیله‌جک‌دیر. آنجاق بونونلا یاناشی اولاراق، هاچاغاجان فاحیشه‌لیک آرادان قالخماییب، بئله خسته‌لیک‌لرین یاییلماسی قورخوسو دا قالاجاق‌دیر.

فاحیشه‌لیک‌له عؤمور سورن قادینین یاشامی دوغرو-دوزگون ساییلا بیلمز. بورادا دایما زؤهره‌وی خسته‌لیک‌لره یولوخماق قورخوسو بیر یانا قالسین، بوندان دا پیسی، بو سایاغی یاشام اینسان پسیکولوژیسینی گئت-گئده سارسیدیب، اونو اوزولونه‌جن داغیدیر. فاحیشه‌لیییه قورشانان قادین‌لار گئتدیکجه ارینجک، طوفئیلی بیر عؤمور سورمه‌یه آلیشیر، ایچکی ایله توتون دوشکون‌لرینه چئوریلیرلر. توپلومون اونا آشیلادیغی: فاحیشه‌لییین اینسانی اسکیک‌لیک اولماسی دوشونجه‌سی، گئتدیکجه اونون آنلاغیندا اؤزونه یئر ائله‌ییر، اونون پسیکولوژیسینده ایز قویور، او، گئت-گئده اؤزونون بوتون موشتری‌لری‌نین ده اونو آلچاق سایدیق‌لاری دوشونجه‌سینه قاپیلیر. عینی ایله راهیبه‌لرده اولدوغو کیمی، فاحیشه‌لرین ده یاشادیغی عؤمور، اونلارین ساغلام غریزه‌لرینی کورلاییب سیرادان چیخارماغا باشلاییر. بوتون بو سبب‌لر ایسه، ان چوخ دا خریستیان اؤلکه‌لرینده، فاحیشه‌لرین یاشامینی آغویا دؤنده‌ریر.

دؤنوب ژاپونا باخان‌دا، بورادا فاحیشه‌لیک‌له باغلی دورومون بوسبوتون باشقا اولدوغو گؤرونور. بورادا فاحیشه‌لیک ده بیر امک فعالیتی ساییلیر، اؤزو ده اونونلا مشغول اولماقلا کاریئر ده قازانماق اولار. آتا-آنالار دا اؤز قیزلاری‌نین بو ایشه قوشولماسینا قارشی چیخمیرلار، آخی بیردن ائله ده اولور، گنج قیزین اؤزونه جئهیز دوزلتمک اوچون بون‌دان باشقا یولو قالمیر. چوخ آدلی-سان‌لی بیلگین آدام‌لارین دئمه‌سینه گؤره، ژاپونلولار سیفیلیسه یولوخمورلار، بو دوغرودان دا بئله‌دیرسه، اوندا چوخ ایلگینج بیر اولای ساییلمالی‌دیر. ژاپونداکی اخلاق نورم‌لارین‌دا بیزده‌کی کیمی آشیری‌لیق اولمادیغین‌دان، اونلاردا فاحیشه‌لره کیم‌سه یوخاریدان آشاغی باخمیر. فاحیشه‌لیک ایندی آوروپا اؤلکه‌لرین‌ده یاییلدیغی کیمی یوخ، هئچ اولماسا ژاپونداکی کیمی اؤز وارلیغینی ساخلاسایدی، بونا یئنه ده دؤزمک اولاردی. چوخ جدی اخلاقی نورم‌لارین اولدوغو توپلوملاردا فاحیشه‌لرین گونو چوخ آغیر کئچیر، هم ده اونلار گوج‌لو معنوی سارسینتی‌لارلا اوزلشیرلر.

آنجاق کیشی‌لرین ده فاحیشه‌لرله آردیجیل اولان ایلیشکی‌لری وارسا، بو، اونلارین دا پسیکولوژیسینده درین ایزلر قویور. ان بیرینجی‌سی، بئله کیشی‌لرده جینسی ایستک‌لرین اؤده‌نیلمه‌سی واختی قادین‌لارا قارشی گؤستریلمه‌لی اولان اینجه داورانیش‌لار چاتیشمیر، جینسی ایلیشکی‌لر اونلار اوچون اؤزونون گئرچک ده‌یرینی ایتیره‌رک، مئکانیکی بیر ایشه چئوریلیر. بونونلا یاناشی اولاراق، اونلاردا بوتون قادین‌لارا قارشی سایغی‌سیزلیق یارانیر. بئله پسیکولوژی ایسه کیشی‌لرین ائولی اولدوقلاری قادین‌لارلا ایلیشکی‌لرینی ده کورلاییر: اونلار یا ائولنمه‌یه ده فاحیشه‌لییین بیر نؤوعو کیمی یاناشیرلار، یا دا ائولی‌لیک‌دن سونرا توپلوم‌دا فاحیشه‌لییین اولماسی اونلاری برک قیجیقلاندیردیغی اوچون، چوخ بؤیوک بیر قیسقانج‌لیق دویغوسونا قاپیلماغا باشلاییرلار.

ائله کیشی‌لر ده وار، چوخ سئودیک‌لری، سایغی بسله‌دیک‌لری قادین‌لارلا جینسی یاخین‌لیق ائله‌‌یه بیلمیرلر. فروید- چولار بونو اونلاردا ائدیپ کوملئکسی‌نین (3) باش قالدیرماسی ایله یوزورلار، آنجاق منه ائله گلیر، کیشی‌لرده یارانان بو پسیکولوژیک پوزغونلوق ائولنمزدن اؤنجه فاحیشه‌لرله یاخین‌لیق ائله‌دیک‌لرینه گؤره یارانیر، اونلارین آلت‌بیلینجینده سئودیک‌لری قادین‌لاری فاحیشه‌لره تای توتماماق ایسته‌یی یاراندیغی اوچون ده، اونلارلا جینسی ایلیشکی‌لر قورا بیلمیرلر. بئله آز اوزله‌شیلن دوروم‌لاری بیر قیراغا قویوب، ائولی‌لیک‌ده اولان قادین‌لارلا کیشی‌لرین جینسی ایلیشکی‌لرینی آراشدیران‌دا، چوخ‌لو کیشی‌لرین، اؤز خانیم‌لارینا آشیری سایغی بسله‌دییینه گؤره، بئله بیر ائولی‌لیک یاشایان قادین‌لارین پسیکولوژیک باخیم‌دان «باکیره» اولاراق قالدیق‌لاری اوزه چیخیر، اونا گؤره ده، بو قادین‌لار جینسی یاخین‌لیقدان هئچ بیر حظ آلا بیلمیرلر. باشقا بیر دورومدا ایسه، کیشی اؤز خانیمینا فاحیشه کیمی یاناشاراق، آنجاق اؤز جینسی ایسته‌یینی اوووتماغین قایغی‌سینا قالیر، بو ایسته‌یین یئرینه یئتیریلمه‌سی‌نین قادینین دا اوره‌یینجه اولوب-اولمادیغی اونو ایلگی‌لندیرمیر، جینسی ایلیشکی‌نین گئدیشینده قادینین اوخشانمالی، اینجه سؤزلرله کؤنلونون اله آلینمالی اولدوغونو ایسه اونودور. بونو ائله‌‌مک یئرینه او، جینسی ایلیشکی‌لر زامانی اؤزونو چوخ قابا آپاریر، خانیمینی اؤزوندن ده، جینسی ایلیشکی‌دن ده چییریندیریر، بو ایسه چوخ واخت آرادان قالدیریلا بیلمه‌ین بیر پسیکولوژیک پوزغونلوغا چئوریلیر.

بیز آرتیق اقتصادی فاکتورلارین قادین-کیشی ایلیشکی‌لرینه آز، یا چوخ اولاراق تأثیر گؤستردیییندن یازمیشدیق. قادین‌لا کیشی آراسیندا باش توتان گئرچک جینسی ایلیشکی‌لر، بیرباشا، یالنیز اونلارین بیری-بیرینه وورغونلوغوندان یارانان، اونلارین ایکی‌سینه ده سئوینج گتیرن ایلیشکی‌لر اولمالی‌دیر. بئله اولمایان جینسی ایلیشکی‌لرین هئچ بیر ده‌یری یوخدور. جینسی ایلیشکی‌لرده باشقا بیر اینسانا آنجاق واسطه کیمی یاناشیلیرسا، بو اونون منلییی‌نی آلچالتماق دئمک‌دیر، بو ایسه اؤزلویون‌ده اخلاقی نورم‌لارین دایاق‌لارینی لاخلادیب سارسیتماق‌دیر. دریندن دوشونمه‌یی، قاوراماغی باجاران اینسان اوچون، جینسی یاخین‌لیق قارشی‌لیق‌لی اولاراق سئوینج گتیرمه‌‌ینده اؤزونون یاپیشیق‌لیغینی ایتیرمه‌یه باشلاییر. آنجاق اؤز جینسی ایستک‌لرینی سؤندورمک اوچون باش وئرن جینسی ایلیشکی‌لردن سونرا، اینسانین ایچینده بیر بوشلوق، بیر پئشمان‌چی‌لیق دویغوسو یارانیر، بئله بیر دوروم تکجه جینسی ایلیشکی‌لرله باغلی یوخ، اخلاقی نورم‌لاری پوزان بوتون باشقا داورانیش‌لاردان سونرا دا باش وئریر. ائله‌جه ده بو دئییلن‌لر تکجه فاحیشه‌لرله یوخ، ائولی قادین‌لارلا باغلی اولاراق دا دا باش وئریر. قادین‌لارین چوخو اوچون اره گئتمک، باشقاسی‌نین ائوینه سیغیناراق، بورادا اؤزو اوچون یاشاییش واسطه‌لری الده ائتمک دئمک‌دیر؛ اونا گؤره ده، ائولی قادین‌لارین، فاحیشه‌لردن داها چوخ، هئچ بیر سئوینج، ایستک دویمادیق‌لاری جینسی ایلیشکی‌لرده اولمالارینی دا، توپلوم‌دا سیخ-سیخ اوزله‌شیلن دوروم‌لاردان سایماق اولار. جینسی ایستک‌لرله باغلی اولان اخلاقی نورم‌لار، بو ایستک‌لرین اؤده‌نیلمه‌سی‌نین گئدیشینده قارشی‌لاشان هر ایکی طرفه درین سایغی گؤستریلمه‌سینه اساس‌لانیر، اونلاردان بیرینده جینسی ایستک‌لرینی اؤده‌‌مک طلباتی یارانماییب‌سا، اوندا بو اخلاقا گؤره، اونو بونا سوروکله‌مه‌یه چالیشماق یول‌وئریلمزدیر. باخ ائله بونا گؤره ده، فاحیشه‌لیک باشلی‌جا اخلاقی نورم‌لارا کؤکوندن ضیددیر، اونا گؤره ده، زؤهره‌وی خسته‌لیک‌لرین کؤکو کسیلسه ده، لاپ ائله فاحیشه‌لره سایغی بسله‌نمه‌یه باشلاسا دا، بوتون بونلارا باخمایاراق، توپلومدا فاحیشه‌لییین کؤکونون کسیلمه‌سینه چالیشماق، اینسان‌لارین باشلی‌جا مقصدلردن بیری ساییلمالی‌دیر.

هاوسلوک ائلیس (4) اؤز اثرلرین‌ده فاحیشه‌لییین آراشدیریلماسینا بؤیوک یئر آییرمیش‌دیر. آنجاق، منه قالارسا، اونون فاحیشه‌لییی دوغرولتماق اوچون گتیردیی استدلال‌لار دوغرو ساییلا بیلمز. او اؤز سؤزونه چوخ اوزاقلاردان باشلاییر، هله مدنیتین یئنی یارانماغا باشلادیغی چاغ‌لاردا کوتله‌وی سئکس‌له باغلی آیین‌لرین کئچیریلدیینی یازیر، او چاغ‌لاردا عادی گون‌لرده جیددی کونترول‌دا اولان جینسی ایستک‌لرله باغلی دویغولارین بو آیین‌لرین کئچیریلدییی گون‌لرده اؤزباشینا بوراخیلدیغینی بیلدیریر. اونون دوشونجه‌سینه گؤره، فاحیشه‌لیک اؤز کؤکونو بو اسکی چاغ‌لارداکی کوتله‌وی سئکس‌له باغلی آیین‌لردن گؤتورموشدور، اونون بو گون ده یاشاماسی، ائله او کئچمیش عنعنه‌لرین بوگونوموزه گلیب چیخماسی ایله باغلی‌دیر. اونون دئمه‌سینه گؤره، ائولی‌لیک‌ده اؤزونو گؤستر‌ن چوخ جیدی اخلاقی نورم‌لار کیشی‌نین اؤز خانیمیندان ایسته‌دییی سئکسوال حظی آلماسینا مانع اولدوغون‌دان، کیشی ده اجتماعی داورانیش نورم‌لارینی پوزمادان بو حظی آلا بیلمک اوچون فاحیشه‌نین یانینا گئتمه‌لی اولور. اؤزلویونده بو سؤزلر، یوخاریدا باخیش‌لارینیزا چاتدیردیغیمیز لئکی-نین سؤزلری‌نین بیر نؤوع تکراری‌دیر، بورادا لئکی-نین سؤزلری بیر آز چاغ‌داش فورمایا اویغونلاش‌دیریلاراق دئییلمیش‌دیر. اونا قالسا، بیردن هاوسلوک ائلیس-ین دئدییی کیمی، قادین‌لار اوچون ده سئکسوال طلبات‌لارینی اؤده‌‌مکله باغلی یاساق‌لار گؤتورولرسه، اوندا اونلار دا اؤز جینسی ایستک‌لرینی بوتونلوک‌له اؤد‌یه بیلمک اوچون کیشی‌لر کیمی، اؤز ارلری اولمایان باشقالاری‌نین یانینا گئدردیلر؛ بو ایسه، کیشی ایله قادینین اؤز جینسی ایستک‌لری ایله باغلی دورتولرینه تام آزادلیق وئرمه‌سی دئمک اولاردی، بئله اولارسا، اوندا اونلار نه اوچون جینسی یاخین‌لیق‌دان قازانج گودن بیر باشقاسی‌نین یانینا گئتسینلر، اونلارین اؤز داورانیش آزادلیق‌لاریندان یارارلاناراق، بیری- بیری‌نین جینسی ایستک‌لرینی بوتون دولغون‌لوغو ایله اؤده‌‌مه‌یه چالیشمالاری داها یاخشی اولمازدی‌می؟

منیم بیلدیییمه گؤره، سئکسوال ایلیشکی‌لره آزاد دوشونجه ایله یاناشا بیلن قادین‌لار، اسکی اخلاقی قاداغالاردان قورتولا بیلدیک‌لری اوچون، کئچمیش چاغ‌لارین قادین‌لارینا باخان‌دا، ایندی ائولی‌لیک‌ده اولدوقلاری کیشی‌لرله اؤز جینسی ایلیشکی‌لریندن قات-قات آرتیق، داها دوغروسو اوره‌ک‌لری ایسته‌دیک‌لری کیمی حظ آلماغی باجاریرلار. بیر سیرا اخلاقی نورم‌لارین بوگونوموز اوچون یارارسیز ساییلماغا باشلاماسی دا، فاحیشه‌لییین آزالماسینا گتیریب چیخارماغا باشلامیش‌دیر. توتالیم، کئچمیش‌لرده، گنج اوغلان اؤز جینسی ایستک‌لرینی سؤندورمک اوچون آرادا بیر فاحیشه‌لرین یانینا گئتمه‌لی اولوردوسا، ایندی او، هانسی‌سا گنج بیر قیزا ایسنیشه‌رک، اونونلا بو ایستک‌لرینی اووودا بیلر، اؤزو ده بو ایکی گنجین ایلیشکی‌لری‌نین سونرادان سئوگی ایله سونوج‌لانماسی شانس‌لاری دا واردیر. ایستر پسیکولوژی، ایسترسه ده فیزیولوژی باخیم‌دان گؤتورسک، بو سایاغی ایلیشکی‌لر، پولا ساتیلان «سئوگی‌یله» یاناشی قویولا بیلمز؛ بورادا هم ده، اخلاقین باشلی‌جا پرینسیپی ده قورونور. اخلاقچی‌لار بئله ایلیشکی‌لری دوزگون سایمیر، بوتون بونلارین اینسان‌لاری پیس سونوج‌لارا گتیریب چیخارا بیله‌جه‌یینی دئییرلر. منیم دوشونجه‌مه گؤره، گنج اوغلان‌لارلا قیزلار آراسینداکی بئله آزاد ایلشکی‌لری بیه‌نمه‌یه ده‌یر؛ بئله ایلیشکی‌لر گنج اوغلان‌لاردا قابالیق‌لا، آمان‌سیزلیغی، گنج قیزلاردا ایسه اؤزونوچکمه ایله واسواسی‌لیغی آرادان قالدیریر. بئله آزاد ایلشکی‌لره قارشی چیخان‌لار ایسه، کیملیین‌دن آسیلی اولمایاراق، فاحیشه‌لییین ساخلانیلماسی اوچون چالیشمیش اولورلار، فاحیشه‌لیک ایسه دئدیییمیز کیمی، آشیری اخلاقی نورم‌لارین حؤکم سوردویو توپلوم‌لاردا، دنگه‌نین پوزولماماسی اوچون اورتایا چیخمیش‌دیر.

یوروملار:

1. ویلیام ائدوارد خارتپول (لئکی ۱۸۳۸-۱۹۰۳) اینگیلیس تاریخ‌چی‌سی، اجتماعی خادیمی اولموش‌دور. لئکی اؤزونون «آوروپادا راسیونالیزمین یارانماسی‌نین و اونون تأثیری‌نین تاریخی» آدلی اثری ایله چوخ تانینیر. لئکی-نی بیر تاریخ‌چی کیمی اولای‌لارین یوخ، ایدئیالارین تاریخی داها چوخ ماراق‌لاندیرمیش‌دیر.

2. ویکتوریان‌چی‌لیق 1901-1837-نجی ایل لرده اینگیلتره‌ده کرالیچا ویکتورییانین حاکمیتی ایل‌‌لرین‌ده‌کی اخلاقی نورم‌لارا اویغون داورانیش‌لار باشا دوشولور. بو چاغ‌لاردا اینگیلتره بؤیوک ساواش‌لارا قاتیلمامیش، اقتصادی باخیمدان یوکسک اینکیشاف یولو کئچمیش‌دیر. بو دؤنم‌ده اخلاقی نورم‌لار چوخ جیددی اولموش، جیددی اخلاقی داورانیش (جئنتئلمن‌لیک) دب‌ده اولموش‌دور.

3. پسیکوانالیزده زیقموند فروید-ون ایره‌لی سوردویو بیر آنلاییش اولوب، دوغولان اوشاق‌لارین آلت بیلینجینده اؤز والیدئین‌لرینه قارشی جینسی ایستک‌لرین اولماسینی ایره‌‌لی سورور.

4. هاوسلوک ائلیس (۱۸۵۹-۱۹۳۹)- سئکسولوژی اوزره تانینمیش حکیم اولموش‌دور. اونون ۷-جیلدلیک «جینس‌لرین پسیکولوژی‌سی اوزره آراشدیرمالار» کیتابی چوخ تانینمیش‌دیر.

بئرتران راسئل-ین «ائولی‌لیک ایله اخلاق» کیتابیندان

qaynaq: Guneynews