ایکی شاه اثر آراسی دوشونجه‌لر

ایکی شاه اثر آراسی دوشونجه‌لر

حیدر بایات

هئچ بیر مئیدان اؤلو گؤردونوزمو؟ اؤلو بلکه داها یاخشی اولا، بیر مئیدان یاری جانلی، بیر مئیدان یاریسی اؤلموش یاریسی اؤله‌جک، بعضیلری دیریلیب چیخیب اؤلولری آتلایا آتلایا قاچاجاق گئجه قارانلیغیندا…

اوسته‌لیک اولا دا بیلر بو اؤلولر هانسی قانلی قادالی بیر دوشمانین اؤلوسو ده دئییل، سنین قارداشلارین، قوهوملارین، حتی اوغلون یوخسا آتاندیر.

بابورنامه ده بئله صحنه‌لری گؤرمک چتین دئییل. سلطان حسین بایقارانین ایکی اوغلو دا اوزرینه قیلیج چکیر، سلطان ایکیسینی ده اؤلدورور. امیر علیشیر آغلاییر.

 هانسی سولطان عمی‌سینین ویلایتی اولان شهره سالدیریر، هانسی سولطان ایسه قارداشی اولان اؤلکه‌یه.

بورادا سون سؤزو قدرت دانیشیر و قیلیج.

اورادان گلیرسن علی و نینو دونیاسینا. ارمنی، گورجو، مسلمان آنلاشماغا یئنی بیر دیل آختاریر، اونو تاپماسا دا، تاپماسینا جان آتیر. بو ایسه بابورشاه زامانیندان قربان سعید زامانینا کیمی گلینن یولدور. بو گونلر بو ایکی اثرله مشغولام. قیرخ یاشدان سونرا تورک دونیاسینا عایید بو ایکی شاه اثری اوخوماق چوخ دا آغیز سولاندیریجی دئییل، اما دئییرم اولا دا بیلردی من بو اثرلرین ووجودوندان بیله خبریم اولمادان اؤلوب گئدم. بو گونلر بئله بئله فیکیرلر ده بیر آز یاشام یارالارینین زحمینه دؤزمه‌یه یاردیم ائدیر.

Share