آرش آزادين «ائوي» دانيشير…

زهره وفائي

آرش آزادين «ائوي» دانيشير…

1382- نجي‌ايلده بير نئچه بئكار(!) بير يئرده توْپلانيب، بيرليك‌ده «انجمن طنزنگاران آذربايجان، آديندا بير مركز برپا ائتمه‌سي قرارينا گلديك. من، آرش‌آزاد، علي حامد ايمان، فيض‌اللهي، پايگذار، نجاراوغلو، يالقيز… و بير نئچه ديگر دوست بو ايشه باشلاديق.

 

البته سايره ايش‌لريمي، بو ايش‌ده «داش» لارين چوْخلوغوندان، نهايت آياق توتمادي و ياري‌دا قالدي. همين ايش‌ده بير پارا فوْرم‌لار يازيليب و «تابعه مركزلره» وئريلمه‌لي‌ايدي تا اونلار بو باره‌ده «تحقيق و تفحص» ائديب و نظرلرين اعلام ائتسين‌لر.

فورم‌لاري يازاركن «آرش» منه اوز دؤندريب، دئدي: «لطفاً يازين مني هر كيم‌دن سوروشورلار، سوْروشسون‌لار. تكجه آرواديمدان سوْروشماسين‌لار و سوراغ‌ توتماسين‌لار، نيه‌كي بيليره‌م اوْ، منيم حاققيمدا نه‌لر دئيه‌جك‌دير!»

آنجاق اوْ دئيه‌ن‌كيمي اوْلمادي، بوگون گوره‌ك اوْنون «ائوي» اوْنون باره‌سينده نه‌دئيير:

شعر… (مثلا!)

واه- واه! گئنه گلدي كيشي

توك‌لري بوْز، ساري ديشي

سيگار الينده توستولور

دئيه‌ن يوْخدي باشقا ايشي

 

فيسقيرديري، چيسقيرديري

كلاّش‌لاري قيشقيرديري

ديسگينديريب ائشقيرديري

باسير نامرده داغ شيشي

 

نه بانك‌‌دا بير قرض‌‌حسنه

باخ جيبينده يئل اسنه!

سلام وئرمير يول كَسَنه

سوْوور هده‌ر يايي- قيشي

 

يالان‌لارين اوستون آچير

بيرده باشينا گول ساچير!

اوْدور هامي اوْندان قاچير

لاپ بئله ائوده‌كي پيشي!

 

صانديق آچير، پامبيق تؤكور

چيبان‌لاري ده‌لير، سوكور

يوْرغونلوقدان ديزه چؤكور

دئيدن يوْخدور سن‌جه كيشي؟!

 

يوْخسولو باشا مينديرير

دينمه‌ين‌لري دينديرير

هر يئته‌نه بير يئنديرير

باخمير بو اركك‌دير، ديشي!

 

هاردا شرّ وار، بو اوْردادير

گاهي توْي‌دا، گاه گوْردادير

بيرگون گؤره‌جك  توْردادير

اوندا توتار زپ‌دن ج…ي!

 

 

Share

Leave a Comment

Time limit is exhausted. Please reload CAPTCHA.