اوغرولار كيمي / اولکر اوجقار

 

 

 اوغرولار كيمي  /  اولکر اوجقار 

   

  بيز 

  اوغرولار کيمي 

  گئجه لر 

  باشيميزي قورخويلا ياستيغا قويدوق 

  و هر بير سسين گلمه سيله ديکسينديک… 

   

  بيز 

  اوغرولار کيمي 

  بيري چاغيراندا آديميزي، دوندو اللريميز 

  من 

  بير عؤمور 

  آنامين گؤزلرينه باخماقدان چکينديم 

  سنسه، سئوگيليم، 

  آسيلاجاغيني گؤزله ين دوستاق کيمي، 

  گله جکدن دئينده، 

  دؤيوندو اورگين… 

   

  بيز 

  اوغرولار کيمي… 

   

   


 

  باغلا يوک-ياپيني، گئدک… 

   

  سن بوردا بير گون گؤرمه دين، 

  آي بالا، آي قيز! 

  مين اکديگين بوغدا بير اولدو، 

  قيتليقلار کئچيردين… 

   

  دؤيوش مئيدانلاريندا ياشاييرميشسان کيمي 

  تاپدالاندي ايچينده آرزولارين 

  کتمک باغلاييب بارماقلارين بئله، قاداسي، 

  سحر ال ده چکمميسن ساچلارينا هئچ! 

  باغلا يوک-ياپيني، 

  کيم داريخاجاق سنه، آي قيز؟ 

  بير گون يوللار باشيني کسرميشلرسه ده ايسته ينلرين 

  ايندي هره سي بير طايفانين آغساققالي 

  هره سي الليليکلر وئرير بايرامدا نئچه اوشاغا 

  سنين هله ده چليک بيلکلرينده بيلرزيکلرين گؤزل! 

  هله ده بير تومنليک ييغيرسان 

  بويونباغي قاييرماغا، سن! 

  ائهئئي، تويوندا اويناييم، آي قيز، 

  نه اوتورموسان؟! 

  هله ده آللي-پوللو گلين اولا بيلرسن، 

  سن هله ده قوشولوب قاچا بيلرسن 

  هه، آما، 

  قاچانين قاچيرداني اولار 

  سئوه-سئوه، اؤپه-اؤپه آپارارلار. 

  آز بويلانيب يئددي قاپيدان هسرتله 

  قول-قولا گئدنلره باخماميسان کي! 

   ” خوشبخت اولاسيز ”  دئينده 

  گؤزلرين آز ياشارماييب… 

   

  دور، سني ده من اؤزوم قاچيرديم، آي بالا 

  دور، سيلکله اتگيندن بو توز-تورپاغي 

  قيريشار صاباح، بيريگون اوزونده گولوشلرين 

  سيرخاب داغي نين زيل گونو سپکي سالار ياناقلارينا… 

   

  دور، واخت ايکن گئدک، 

  گون باتار، چاره سيز قالاريق ايکي قيز طايفاسي 

  چؤل-باييردا بيز… 

  دور، قادان آليم، 

  قارا گون، 

  قارا گيله، 

  تبريزيم!  

   

 

 

Share

Leave a Comment

Time limit is exhausted. Please reload CAPTCHA.