Add Durna to your favorites
 
   |  آرشيو   ا   ادبيات  ا  اوشاق  ا  قادين   ا   رئداكتوردان      
 

  "تراختور "،  فوتبال تيمي يوخ، بير هويت آنلامي!

 حسن راشدي  

40 ايل تهراندا ياشاييب و 55 ايل عؤمرومدن كئچندن سونرا جمعه گونو 25 دي 1388 تاريخينده  ايلك دفعه اولاراق بير فوتبال اويونونون تاماشاسينا تهراندا  " آزادي " استاديومو آدلانان يئره گئتديم !

مني ده بورا چكن سون ايللرده " تراختور " فوتبال تيمي حاقدا اوزاقدان – ياخيندان ائشيتديگيم چئشيتلي سؤزلر و فيكيرلر اولموشدو  !

بو گونكو مسابيقه ده "تراكتور سازي" و يا اؤزو ايله معيّن و اؤزل بير آنلام داشييب توركلر طرفيندن اصرارلا دئييلن " تراختور " فوتبال تيمي ايله تهرانين مشهور فوتبال تيمي " استقلال "ين ياريشي اولاجاقدي .                                                  

بير تعداد دوستلارلا كرج– تهران اوتوباني ايله مسابيقه مئيداني طرفينه يوللانديق.

بير رسم اولاراق هر تيمين طرفدارلاري مينديكلري ماشينا او تيمين رنگلي بايراغيني آساراق تهرانین " آزادي " استاديومونا طرف حركت ائديرديلر. بيزيم يانيميزدان كئچن بير مينيك پرايد ماشيني نين  پنجره سيندن بير گنج و تراختورون طرفداري، قيرميزي پارچادا توركجه يازيلميش " يئل ياتار طوفان ياتار ياتماز تراختور بايراغي" ني آسميشدي . كرج- تهران اوتوبانيندا " استقلال " تيمي نين بايراغيني ماشينلاريندان آسانلار و باصطلاح استقلال تيمي نين طرفدارلاري، هر بير ماشيندا تراختورون قيرميزي بايراغيني گؤروردولر اونلارا قارشي نه جور ادبسيز و تربيه سيز حركتلر اؤزلريندن گؤستريرديلر اوندا ايشيم يوخ !

نهايت گئديب استاديومون پاركينگ قاپيسينا چاتديق، هله پاركينگه چاتماميشدان، يول قيراغيندا قيرميزي و گؤي رنگلي تراختور و استقلال بايراقلاريني ساتانلارين بازاري دا چيچكلنميشدي !

من كيمي بيرينجي دفعه بورا گلنلره، سانيرام بو صحنه لر چوخ ماراقلي ايدي ؛ تهراندا حاضيرلانيب عادي ساتيجي لار طرفيندن شور و حرارتله تراختور يانداشلارينا ساتيلان قيرميزي بايراقلارين يازيلاري عموميتله  توركجه ايدي، هم عرب اليفباسي ايله و هم يئني اليفبا ، يعني لاتين اليفباسي ايله .

منيم گؤزومه  قيرميزي بايراق اوستونده فارسجا يازي چوخ نادر حاللاردا  دگيردي ، لاكين انگليس ديلينده  ، بايراقلار ، قيرميزي بؤركلر ، آلينباغي و بويون شالي اوستونده "  Tractor"   سؤزو يازيلميشدي،  آما " آزادي " استاديوموندا ساتيلان بليط لر اوزه رينده ده  انگليسجه يازيلميشدي :    "1970  club Traktor "  !! ؛ هانسي "تراكتور "  انگليسجه دوز يازيلميشدي اوندادا ايشيم يوخ !

ساتيلان قيرميزي بايراقلاردا " ياشاسين آذربايجان "، " ياشاسين تراختور "جومله سي باشقا يازيلاردان داها چوخ گؤزه چارپيردي .

ماشيني پارك ائديب استاديوم قاپي سيندا باشقا دوستلاري گؤزله ديگيميز 10- 15 دقيقه ايچينده ،   قيرميزي تراختور بايراغينا بورونن، باشلاريندا قيرميزي بؤركلر ، توركجه يازيلميش الينده "آذربايجان دياريميز  تراختور افتخاريميز " قيرميزي بايراق، بوينوندا قيرميزي شال ، گئيديگي قيرميزي بولوزون دوشونده Traxtur  سؤزو ، اوز- گوزونو قيرميزي رنگله بويايانلار بالاجا اوشاقلاردان توتدو بؤيوك ياشليلارا قدر آخين – آخين گليرديلر ؛ بو صحنه لري گؤردوكده ندنسه 1379 -  1383 ايللر آراسي " بابك قالاسي مراسيمي "  ياديما دوشدو ؛ اوندادا ائله انسانلار ، تير آيي نين ايكينجي  پنجشنبه و جمعه سي، بوجور و بو شوق – ذوق ايله آذربايجانين  و حتي ايرانين هر يئريندن بابك قالاسينا يوروش ائديرديلر!

هله بير تعداد موقعيت شناس لار،  قيرميزي يازان فيرچالار و کئچیجی رنگلرله  ائله استاديوم قاباغيندا، تراختورون قيزغين طرفدارلاري نين اوزونو قيرميزي رنگله بوياييب 500 تومن  1000 تومن قازنماغي دا اونوتماميشديلار ، البته گؤي رنگله اسقلال طرفدارلاري نين اوزونو بويايانلاردا  وار ايدي ، آما قيرميزي يازانلارين تعدادي داها چوخ ايدي !

ايلك اؤنجه اؤز- اؤزومه دئييرديم بو تهراندا " استقلال " تيمي نين طرفداري چوخ اولدوقدا يقين كي ، "تراختور " طرفدارلاري آز گؤزه دگه بيلرلر ، آما بو صحنه لري گؤردوكده گؤردوم  تراختورون يانداشلاري يالنيز تبريز ، آذربايجان و باشقا تورك ديللي اوستانلايندا يوخ ، ائله بو تهران و كرج ده بلكه " استقلال " و " پرسپوليس " طرفدارلاري قدر  اولا بيلر ؛ چونكو بو گون بورا گلنلر يالنيز تبريزدن يوخ ، ائله بو تهران ، تهران اطرافي شهرجیکلر و كرج ده ياشايان توركلر تراختورون قيزغين طرفدارلاري عنواني ايله بورايا گلميشديلر ؛ تهران و اطراف شهرجیك لردن علاوه حتي شيراز شهريندن و فارس اوستاني نين قشقايي توركلري، خوراسان توركلري ، و  توركمن توركلري ده  تراختورون طرفداري اولاراق استاديوما گلميشديلر !

هله مسابيقه دن سونرا تهراندا ياشايان توركلرين چوخو  استادويوما گلمه ديكلريندن تاسّوفلنيريلر ، چونكو  اونلار بئله تصور ائتميشديلر استاديومدا يالنيز 10% يئر، تراختور طرفدارلارينا وئره جكلر و يئرين اولماماغي تصورو ايله سئوديكلري  تيمين تشويقينه گله بيلمه ميشديلر !

مهندس صرافي ايله منيم،  اؤزل يئرده اوتوروب فوتبالا باخا بيله جگيميزه ايمكان اولدوغو حالدا ، عادي يئرلرده و تراختورون قيزغين طرفدارلاري  آراسيندا اوتوروب اويونا باخماغي ترجيح ائتديك، ائله بوجور اويونلارا باخماغين لذتي ده بوندادير !

استاديوم ايچينده ده قيرميزي پارچالاردا ، ياشاسين آذربايجان     ياشاسين تراختور  ، آذربايجان دياريميز     تراختور افتخاريميز ، يئل ياتار طوفان ياتار  ياتماز تراختور بايراغي ، زنگان شهري   تراختور طرفداري ، و بونلارا اوخشار  چوخلو شعارلار پارچالاردا يازيليب و استاديوم  نرده لريندن آسلانميشدي ؛ لاكين بو يازيلارين ايچيندن بير يازي نسبتا بؤيوك پارچادا  مني و چوخلاري نين نظريني داها چوخ اؤزونه چكدي :

تورك ديلينده مدرسه         اولمالي دير هركسه !

بو يازيني گورن مامورلار ،  يازي طرفينه گليب و يازيلي پارچاني نرده اوستوندن گؤتورمك ايسته ينده بيردن تاماشاچيلار طرفيندن  گورولتولو سسله اعتراض شعارلاري اوجالدي !

مامورلار داها بو شعارلي پارچاني  ييغيشديرماغا اصرار اائتمه دن اؤز يئرلرينه قاييتديلر !

اويون ساعات 15:15 باشلاديقدا  استاديومون ياريسيني  قيرميزي رنگه چئويرن تراختور طرفدارلاري آياق اوستونده  قيزغين و آردي كسيلمه دن شعارلارينا باشلاديلار ؛

 استاديومون بير طرفي : 

ياشا................................ سين

باشقا طرفي :

آذر...................................بايجان !

شعاري استاديومو لرزه يه گتيريردي !

بوشعارلارلا برابر ، بارماقلاري ايله ده بوزقورد علامتي توتاراق هاوادا يئللنديريرديلر !

بوز قورد علامتي بعضي لري نين يانيندا و يا بعضی اؤلكه لرده  آشيري ناسيوناليسم سيمگه سينه چئوريلسه ده  گونئي آذربايجاندا اؤزلليكله تراختورچولارين آراسيندا " تورك كيمليگي " و " تورك هويتي "  آنلاميني داشيماقدادير و هئچ بير آشيري توركچولوك معناسيندا  دئييلدير .

بيرآز اويون واختيندان كئچميشدي كي ، يئنه مامورلار گليب " تورك ديلينده مدرسه    اولمالي دير هر كسه "  شعارلي پارچاني ييغماغا اصرار ائتديلر كي ، تراختور طرفدارلاري مامورلار لا درگير اولماغي مصلحت بيلمه ييب اؤزلري بو شعاري قالديرديلار .

اويوندان چوخ،  تراختور يانداشلاري نين  آردي كسيلمز معنالي - مفهوملو و چئشيتلي و آهنگلي شعارلاري استاديومو هيجانا گتيريردي ، بير آن بئله، استاديوما گلنلر كيچيك اوشاقدان توتدو  گنج  اؤيرنجي و ياشليلارا قدر ، شعارسيز و آرام اوتورموردولار !

اويونون نتيجه سي  چوخ هيجانلا  ایکی - ایکی یه  باشا چاتديسا ، منيم عؤمرومده ايلك دفعه فوتبال اويونونا  تهران استاديومونا گليب بورادان اونودولماز خاطره ايله آيريلديقيمدان علاوه ، گله جه يه داها درين آرزو و اوميدله باخاجاغيما سبب اولدو !