Redaktordan
Doktor Davud Eldəniz
 

Yasin bombasına gülür
ياسين بومباسينا گولور

حماسين ديني رهبري شيخ احمد ياسين حاققيندا ايكي ايل اؤنجه من بير مقاله  چئويرميشديم. َاونون چاپي بوگون يئرينه دوشور.

کيم افشار سليماني دگيل؟

Uzaqlara qaçmaq istəyən balaca Dovşan

اوزاقلارا قاچماق ايسته ين بالاجا دووشان

Azərbaycan respublikasında siyasi məhbuslar və Avropa şurasının rolu!

نگاهي به مسئله فدراليسم در ايران و خواسته هاي جنبش ملي آذربايجان

HTML     PDF

"Birlik Günüdur" 

"آذربايجان دانيشير!" 

Milli azadlıq və dövlət/millət məfhumları

Neft - Təhlükə və ya imkan Katarina Wallentin/

"Iqtisadi çoxalma sərmayadarları qorxudur" Jean-Paul Fitoussi

 

شوك گونو

صاباح مهر آيينين بيري ايراندا يئني درسليك ايلي باشلانير. بوگون 7 ياشيندا آذربايجانلي اوشاقلار هيجانلا بيرينجي دفعه اولاراق مكتبه قدم قوياجاقلار. آنجاق بيرينجي درس گونو بو معصوم اوشاقلار اوچون شوك گونو اولاجاقدير. بير گون كي 7 ياشيندا اوشاق سو يئرينه آب، چؤره ك يئرينه نان دئملي اولاجاقدر.

شبهه سيز بو عدالتسيزليك و غير اينساني حركتين علييهنه آذربايجان خالقي مبارزه آپارماليدير. آنجاق بو مبارزه او زامان ثمره لي اولاجاقدير كي آذربايجانلي آيدينلاري لاقئيدليكدن (بي تفاوتليقدان) چيخسينلار. بير روس يازيچي يازير: "دوشمندن قورخما، او يالنيز سني اؤلديره بيلر. دوستدان قورخما، او يالنيز سنه خيانت ائده بيلر. آنجاق لاقئيددن قورخ، او بير وضعيت قاباغا گتيره بيلرلر كي اوندا هم اؤلوم واردير، هم خيانت.

سون ايكي اوچ نسلين( اوخو آتا-بابالاريميزين) لاقئيدليكلري " هر كيم ائششك اولسا بيز اونا پالانيق" مانقورتليقدان باشقا آيري بير شئيي تمثيل ائتمير.

بوگون يئني نسل آتا-بابالارينين بي تفاوتليندن فاصله آلاراق گئدير كي اوز اينساني حاققلاريندان محكم دفاع ائتسين. بو نسل بو نتيجه يه چاتيبدير كي ايراندا ياشايان 30 ميليون آذربايجانلينين اؤز آنا ديلينده تحصيل آلما حقوقو واردير! بو نسل داها آتا-بابالاري كيمي آيي يوخوسونا گئتميره جكدير!

030622

 

رسمي ديل، ارتباط ديلي

هر دورده بير افغانلي تاجيك اولاراق اونلارين ديللري افغانستاندا رسمي ديل ساييلير.

هر آلتيدا بير عراقلي كورد اولاراق اونلارين ديلي عراقدا رسمي ديل ساييلير.

بو فاكتيلاري نظره آلاراق بير سيرا فدرالچي آذربايجانلي فعاللارين بو نظري كي گله جك فدرال ايراندا هله قوياق فارس ديلي اييرمي ايلده رسمي و يا رابيط ديل قالسين، چيمچشديريجي بير فيكيردير. منجه بئله فدرالچيلار هله ائليه بيلميريبلر فيكيرلريني سون 80 ايلده ايراندا حاكيم اولان پان فارسيسم ايده لوژي سيندن تميزله سينلر.  تحميلي ديلي سئون بو فدرالچيلاردان  من او فدرالچييا پناه آپاريرام كي اونون حداقل ايستي فارس ايله %100 برابر اولماقدير.

بو گون جنوبي آذربايجانلينين حياتي احتياجي ايش، چؤرك و مدني آزادليقلار  يانيندا اونون آنا ديلينين رسمي اولماسي و ها بئله اينكيشاف اوچون دونيانين علم، صنعت و ارتباط ديليني، اينگيليزجه ني اؤيرنمكدير.

040320

 

 

افغان اؤزبكلرينه بير اؤنملي اوغور!

افغانستانين لويه جرگه توپلانتي سيندا اؤزبكللرين آنا ديللري حاققيندا مبارزه نتيجه وئردي. بئله ليكله افغانستانين يئني آناياساسيندا اؤزبك ديلي اؤزبكلرين اكثريتده اولان منطقه لرده رسمي ديل اولور. بير اؤلكه ده كي سون زامانلار دري ديلي اداره ديلي اولوب و پشتو ديلي اكثريت ديلي دير، اؤزبك ديلي اوچون بوندان آرتيق اوغور قازانماق راحات مبارزه اولا بيلمزدي.

اؤزبكلرين بو اوغورو يالنيز او زامان كامل اولاجاق كي افغانستاندا دموكراسيا اينكشاف ائديب يئني حقوقي دولت يارانماق ايله بوتون كوتله نين او جمله دن  قادينلارين، اوشاقلارين و زحمتكش قشرلرين حقوقلارينيا احترام قويوب عمل اولونسون. گئچميشده  اؤزبك ليدري ژنرال دوستوم اؤز مخالفلريله غير اينساني رفتار ائلييبدير. آنجاق سون زامانلار اونون هومانيستي ژستلري اميد وئريجيدير. او زامان كي افعانستانين اوردو باشچي سي ژنرال فحيم موسكووادا يئني مدرن تانكلار آلماغي مذاكره ائديردي ژنرال دوستومين بو سؤزي كي افغانستانين عاجيل احتياجي تانك آلماقدا يوخ بلكه يئني مكتبلر و خسته خانالار آچماقدادير، گله جك اوچون اميدلري آرتيرير!

040105

 

داك دا گئدن پروسسلره قيسا باخيش

داك دا يارانان انشعابا رئاكسيالار چوخ اولوبدور! بو عكس العمللر اؤزونو مختلف شكيللرده گؤرسدير: بيريسينين اورگي آغريير؛ بيريسي گئجه لر ياتانمير؛ بيريسي ده تيمساح تكين گؤز ياشي تؤكور. نسخه يازانلاردا چوخدور؛ آنجاق آراني قاريشديرانلارين ساييسي يول گؤرسدنلردن داها چوخدور.

 بيريسي يوخدور كي، دئسين قارداش بو ايكي فراكسياني يئني دن بير تشكيلاتدا بيرلشديرمك آذربايجان خالقينين نه درديني درمان ائده بيلر. بو اينسانلارين آذربايجانچي اولمالاريندا هئچ شبهه يوخدور. آنجاق بو اينسانلار دموكراسي پرنسيبلرينه احترام قويماليديرلار. ايكي نفرليك اقليتن هانسي دليل-بهانه ايله اولور اولسون عصيان بايراغيني قووزايب، داك آدي ايله قورولتاي چاغيرمالاري آنتي دموكراتيك بير حركتدير! او بيريسي طرفدن دموكراتيك بير تشكيلاتدا اقليت فراكسيانين حقوقلارينا احترام قويولماليدير!

داك عمومي بير تشكيلات اولاراق پلوراليسم پرينسيبلرينه احترام قويماليدير. تاسف ايله داك رهبريتي سياسي پلوراليسمي آياق آلتينا قوروب ايستقلاچي بير حزب رولو اوينايير.  حتي ايشي او يئره چاتديرميشدي كي جنوبي آذربايجانا تبعيدي دولت ياراديردي.

شبهه سيزهر ايكي جناح اؤز حزبلريني قورب سئوديكلري فورمدا فعاليت ائتمه لي دير. آنجاق هر ايكي جناح بونو بيلمه ليديرلر كي جنوني آذربايجانين آزادليغا و رفاها چاتماسي جنوبليلارين داخيلده آپارديغي مبارزه لريندن آسيليدير. بير مبارزه كي اوندا ايستقلاچي تشكيلاتلار ايله فدرالچي تشكيلاتلارين همكارليغي بير ضرورتدير.!  

 واقعي بير داك حزب رولو اوينامادان، سياسي پلوراليسمه داياناراق آذربايجانچي سياسي فيكيرلرين اورتاق پلاتفورم اسايندا فورمالاشيب و ايچري ده گئدن حركتين رهبري يوخ بلكه دياسپوراسي اولماليدير!

 7-جي قورولتايلارين نتيجه لري بونو گؤرسده جك كي داك رهبرلري سون باش وئره ن حادثه لردن لازيمجه تجربه آليبلار يا يوخ!

         داود ائلدنيز

040107

 

 


 Materiallardan istifadə zamanı qaynağa istinad vacibdir
استفاده از مطالب دورنا با ذكر منبع بلامانع است

www.durna.info | eldeniz@yahoo.com